Somermodes vir 2010
2010-08-11 16:31
Met die Kaapstadse modeweek wat vandeesweek afskop het ek by 'n paar ontwerwpers uitgevind wat die nuutste modeneigings vir die somer is.
Volgens Craig Port, 'n mode-ontwerper, is vlootblou, wit en grys hoogmode by mans.
"Tydens verlede jaar se resessie was die mode baie donker, maar hierdie jaar het dit plek gemaak vir helder, ligte kleure.
"Daar is ook nie iets soos 'moets en moenies' wanneer dit by mode kom nie. Mense moet egter net hul figuur in gedagte hou en altyd iets kies wat dit gaan komplementeer."
Items wat elke man in sy kas behoort te hê:
- Donker denim
- Wit hemp
- Swart noupassende baadjie
- Goeie paar swart skoene
Kim Govaars wat vir Miss Port werk (die vroue-reeks van Craig Port) het gesê hierdie somer is die basiese kleure soos wit, vaal en neutrale kleure terug.
"Rokkies of langerige t-hemde wat as rokkies gedra kan word is die nuwe gier by vroue. Met klere wat uit systof gemaak is wat weer ‘n verskyning maak."
Volgens Kim is kort denimbroekies met 'n goeie paar kouse en hoë hakke ook die nuwe ‘in-ding’. Jong meisies moet ook onthou kousbroekkies is nie meer mode nie, Opaque kouse is terug.
Items wat elke vrou in haar kas behoort te hê:
- Wit hemp
- Denim hemp
- Katoen rokkie
- Opaque kouse
- Noupassende denim
- Sy-kamisool
- Enkelstewels
LoveWaterLove spesialiseer in swemklere, en volgens Margit Roberts, 'n ontwerper, is gedrukte materiaal en asimmetriese eenskouer-ontwerpe hoogmode, met pastelkleure en neon wat die nuutste neigings is.
Volgens Margit word sy deur mooi kleure, patrone en teksture geïnspireer en sy laat soms ook toe dat haar ontwerpe deur haar vriende beïnvloed word.
"Wanneer mense swemklere koop is dit belangrik dat hulle die regte vorm kies wat by hul figuur gaan pas en hul velkleur gaan komplimenteer. Dis veel beter om hul keuse volgens die nuutste mode te maak."
Deesdae word die kies van swemklere meer op 'n algehele voorkoms gebasseer as net op die klere self, met bykomstighede soos handsakke, oorbelle en sonhoede wat 'n groot rol speel.
Op die vraag of die eenstuk of tweestuk in die mode is, het Margit gesê: "Die eenstuk word nie meer gesien as 'n funksionele item om onvolmaakhede weg te steek nie. Inteendeel – dit het baie modieus geword met meisies wat dit dra om die mode van ouds terug te bring.
"Maar die tweestuk is meer gewild, en daar is steeds meer tweestukke as eenstukke op strande."
Margit se raad aan opkomende ontwerpers is om nie bang te wees om raad van mense in die bedryf te vra nie.
"Dit neem 'n tydjie om 'n handelsnaam gevestig te kry, maar om iemand te sien dit dra, maak als die moeite werd."
Malcolm Klûk van Klûk CGDT sê voor hy op die nuutste neigings van 'n seisoen besluit, gaan soek hy eers na materiaal en kyk of dit pas by die patrone en ontwerpe wat hulle inspireer.
Volgens dié mode-ghoeroe begin mode baie meer persoonlik te raak, maar mense moet egter net seker maak hulle dra die regte onderklere!
Kledingstukke wat elkeen in hul klerekas behoort te hê is die streep t-hemp, met 'n uitklok-broek en iets khaki is ook altyd 'n wenner.
Malcolm se raad aan aspirant-ontwerpers is om baie versigtig te wees want dit is 'n baie mededingende bedryf.
"Jy moet harder werk, baie meer doen en verder as jou portuurgroep gaan om sukses te behaal."
- Volg Nuus24 op Twitter.