Só kon Jackson se lewe gered word
2011-10-13 13:23
Los Angeles – Dr. Alon Steinberg, 'n kardioloog, het getuig Michael Jackson kon vandag steeds gelewe het as dr. Conrad Murray sy werk behoorlik gedoen het.
Steinberg het ses foute wat Murray na bewering gemaak het, uitgewys wat 'n direkte uitwerking op die 50-jarige sanger se dood gehad het.
Steinberg het aan die hof gesê Murray moes in die eerste plek nie die verdowingsmiddel propofol aan Jackson gegee om hom vir slapeloosheid te behandel nie.
Hy moes ook nie die middel toegedien het sonder die nodige toerusting nie.
Volgens Steinberg het Murray ook nie die nodige voorbereidings getref vir 'n noodgeval nie. Hy het kardiopulmonale resussitasie (KPR) met een hand op Jackson toegepas terwyl die sanger nog op die bed gelê het. Steinberg het getuig Murray moes probeer het om lug in die sanger se longe te kry.
Murray moes ook twee hande vir die KPR gebruik, en dit moes op 'n harde oppervlak toegepas word. Volgens Steinberg het Murray te lank geneem om die 911-nooddiens te bel nadat Jackson opgehou het om asem te haal.
Murray het glo ook nie enige mediese rekords van Jackson gehou wat kon help om hom in 'n noodgeval te behandel nie.
– Mail Online.
– Volg Nuus24 op Twitter.