Só eindig Egoli

2010-03-02 19:09

Van Egoli se gunsteling karakters.

Herman Eloff en Esti Brandt

Kaapstad – Nenna en Nora kuier mos nou al jare lank weekliks in ons sitkamer. Maar Dinsdagaand het hulle vir die laaste keer gegroet.

Mnet se gewildste sepie wat die afgelope 18 jaar op die kassie te siene was het sy laaste buiging gemaak.

In die heel laaste episode ooit van Egoli het Cecille opgedaag vir Chris se gedenkdiens. Sandra Prinsloo se verskyning aan die einde was 'n aangename verrassing, maar dit was omtrent die enigste hoogtepunt.

In die heel laaste toneel sien ons vir Louwna dramaties by die bekende trappe in die Edwards-huis afstap. Sy is van kop tot tone geklee in swart en trane sit vlak in haar oë.

En só eindig Egoli. Die beloofde dramatiese einde was ietwat van 'n anti-klimaks.

Getroue aanhangers sal egter bly wees om te hoor dat Mnet ‘n ekstra 18 episodes van Egoli gaan uitsaai waartydens daar ‘n kykie na die verlede geneem sal word.

Oud en nuwe Egoli-sterre sal hierdie episodes aanbied wat sal bestaan uit die room van die afgelope 18 jaar se stories.

Na bewering sal die Egoli-film later vanjaar in teaters landwyd te siene wees.

–Nuus24