Skindertong vas oor ‘dronkbestuur’
2010-09-08 07:43
Kaapstad - Die glanspersoonlikheid Loui Fish is eergisteraand in Sandton in hegtenis geneem weens beweerde dronkbestuur.
Fish, ’n gewese model wat voorheen met die oud-Bafana-sokkerspeler Mark Fish getroud was, is in die polisiekantoor aangehou en later op borgtog van R1000 vrygelaat.
Sy is tans landwyd bekend as een van die aanbieders van die gewilde skinderprogram oor glansmense, Tonge Los, wat op kykNET uitgesaai word.
Sy is onlangs aangewys as die mede-aanbieder van ’n werklikheidsprogam Verander my, waaraan 24 vroue van Maandag tot 2 Oktober in Pretoria gaan deelneem en wat vir die nuwe kanaal Afrikaanse Satelliet-TV vervaardig word.
Sy moet presies ’n jaar ná haar inhegtenisneming – op 7 September 2011 – in die Randburgse landdroshof verskyn.
Lt.kol. Eugene Opperman, Gautengse polisiewoordvoerder, het gister Fish se inhegtenisneming en vrylating op borgtog bevestig.
Gevra waarom haar hofverskyning eers oor ’n jaar is, het Opperman gesê: “Bloedmonsters van Fish is ná haar inhegtenisneming geneem om die alkoholinhoud van haar bloed te bepaal. Die verhoor kan nie begin voordat die uitslag daarvan bekend is nie.”
Volgens hom is Fish deur die polisie van Sandton in hegtenis geneem omdat sy “onseker en wisselvallig” bestuur het.
Hy het bevestig dat geen botsing plaasgevind het nie en dat niemand beseer is nie.
Fish se prokureur, Isaac Mabunda, het haar eerbygestaan met haar borgtogaansoek by die polisie.
Haddad Viljoen, reklamebeampte van kykNET, het gesê Fish sal as aanbieder van Tonge Los aanbly “totdat die reg sy volle gang gegaan het”.
- Die Burger