Shimmy se stuk kom Kaap toe
2012-01-27 07:00
Kaapstad. – Die grapjas van Worcester, Shimmy Isaacs, is terug by vanjaar se Die Burger-Suidoosterfees in ’n eenvrou-komediestuk met die titel Howzit my Bra.
Sy sal drie vertonings in die Brimstone/Lion of Africa-arena in die Kunstekaap-teater lewer.
Isaacs het ten tyde van verlede jaar se Suidoosterfees die maagspiere behoorlik laat werk met haar eenvroustuk Allie Pad Funny Worcester.
Vanjaar se stuk beloof om dieselfde te doen.
Sy het reeds ’n landwye toer met Howzit my Bra gehad en dit is goed deur gehore ontvang.
Sy is ook vir dié stuk as die Klein Karoo Nasionale Kunstefees se Kanna Slurpie-wenner aangewys.
Die komedie takel verskeie kwessies rondom die bra, en borskanker word ook bespreek.
Isaacs vertel dat sy nie net mense wil laat lag nie, maar hulle ook laat dink oor die kwessies wat sy aanspreek.
Die regisseur, Anthea Thompson, het gesê Isaacs weet hoe om stories goed te vertel.
“Sy is baie toeganklik en weet hoe om ’n gehoor te vermaak. Dis wonderlik om met haar te werk.”
Die vertonings is op 15 Februarie om 21:00, 18 Februarie om 14:30 en 19 Februarie om 18:30 te sien.
Kaartjies kos R75 en is by Computicket beskikbaar.
Die fees is van 14 tot 19 Februarie in die Kunstekaap.
– Volg Nuus24 op Twitter
- Die Burger