Sexy sanger breek aanhanger se vinger
2009-09-08 06:30
Philip de Bruyn
Kaapstad. – Dit was’n “gespeel hier en ’n ‘rondfoolery’ daar” – en daar breek Jay, een van die hartebeker-sangers van die popgroep Eden, een van sy aanhangers se vingers morsaf.
Die middelvinger, om presies te wees.
“Die vinger was só gebreek dat dit eintlik horisontaal teenoor sy ander vingers gestaan het,” het Jay gister droogweg vertel.
Alles het begin ná ’n onlangse vertoning van Eden op Ceres. Ná die vertoning is sy sangmaats gastehuis toe, maar hy het nog ’n bietjie saam met inwoners van die dorp in ’n plaaslike kuierplek gaan kuier.
“Soos dit maar met sulke kuiertjies gaan, het die manne laataand met ’n gespeel en ’n ‘rondfoolery’ begin.
“Ons het arm gedruk en vinger getrek en sulke goed.
“Daar was die fris onderwyser en rugbyafrigter op die dorp, almal het hom Boland genoem, wat met my wou vinger trek. Toe ek weer sien, was sy vinger morsaf.
“Gelukkig was daar ’n dokter naby en die vinger kon gespalk word.
“Hy het teruggekom kuierplek toe en ons het lekker verder gekuier, no hard feelings.”
Wat Boland duidelik nié geweet het nie, is dat Jay geseën is met baie sterk hande wat hy, volgens hom, van sy pa geërf het.
“Hierdie hande en vingers van my is soos vice grips,” skerts hy.
“Buitendien, ek het self ook deurgeloop. Een ou het teen my arm gedruk en my ’n goeie les geleer.”
- Die Burger