Schuster versondig weer siele in nuwe fliek
2010-02-02 10:36
Annami Mailovich
Johannesburg - Om teen vyfuur die oggend met ’n span plakkers, bokke, skape en lekker vuurmaakhout op Seepunt uit te span is ’n wenresep vir amok.
In sy nuutste rolprent, Schucks Tshabalala’s Survival Guide to South Africa 2010, het Suid-Afrika se rolprentreus Leon Schuster weer sy skelmkamera-streke uitgehaal.
Met ’n brief waarin koningin Victoria glo sê ’n deel van die huidige Seepunt is êrens in die 19de eeu aan die Amararabe van Transkei geskenk, het Schuster en sy span die Kapenaars se siele ’n dag lank versondig.
Aan die einde van die dag het twee polisiebeamptes besluit genoeg is genoeg.
“Hulle gooi my toe in ’n vangwa met ’n moewiese sirene en daar gaan ons,” vertel Schuster.
Sy naam het gelukkig gekeer dat hy in die tronk beland.
“Ek speel die rol van Shucks Tshabalala, ’n swart ou, wat ’n toergids vir buitelanders is wat voor die Wêreldbeker in Suid-Afrika kom toer.
“Hulle leer meer van die land, hoe om die Zoeloedans te doen en dit te geniet. En om in jou pasoppens te wees.”
Schuster se laaste drie rolprente, Mr. Bones 1 en 2 en Mama Jack, was storieflieks. Schucks Tshabalala het ook ’n storielyn, maar die tradisionele komiese sketse is tussendeur gevleg.
“Ek het die gevoel gekry die publiek hunker na my gekskeergoed – waaroor ek nie meer so mal is nie. Ek is ouer en banger. Ek is banger om gebliksem te word. Afrikaners wat na my movies kyk, put geweldige genot daaruit as ek ’n klap kry.”
Hy sê mense het hom egter in sy vorige sketsrolprente begin herken.
“Net ’n snor, baard en hoed was nie meer goed genoeg as vermomming nie. Dit lê seker in my oë of stem.” Die grimering in die nuwe rolprent is prosteties.
Allan Boesak, Breyton Paulse en Helen Zille is onder die slagoffers van die nuwe gemaskerde gevaar.
“Daai mense het nie een deur my gesien nie. My mondering was dié keer te goed.”
Hoewel 2010 aangebreek het en buitelanders Suid-Afrika gaan binnestroom, glo Schuster steeds sy nuwe prent is net vir Suid-Afrikaners.
“Daar is te veel in-jokes wat net ons sal verstaan; ons, wat elke dag die koerant en Sondae Rapport lees.”
- Beeld