Sangeres verbreek swye oor Armstrong

2013-01-23 09:19

Los Angeles – Die sangeres Sheryl Crow, wat jare lank met die fietsryer Lance Armstrong in 'n verhouding was, het vir die eerste keer ná sy bekentenis haar swye verbreek.

Sy het op die TV-program Entertainment Tonight gesê sy voel sleg vir Armstrong en sy famile.

Crow en Armstrong was vanaf 2003 tot 2006 in 'n verhouding – 'n tydperk wat oorvleuel het met Armstrong se opkikker-oortredings en drie van sy sewe Tour de France-oorwinnings.

"Ek weet hoe hard hy gewerk het om daardie titels te wen en weet jy, dit was moeilik om te kyk," het die 50-jarige Crow gesê.

"Ek het sleg gevoel. Ek het sleg gevoel vir hom en sy familie en ek het soort van soos die res van Amerika gevoel," het die sangeres gesê oor haar ervaring toe sy verlede week na Armstrong se onderhoud met Oprah Winfrey gekyk het.

"Hy is 'n held na wie ons gekyk, opgekyk en bewonder het."

Crow het gesê sy glo nou Armstrong is verlig nadat hy erken het hy het verbode middels gebruik nadat hy dieselfde bewerings vir meer as 'n dekade heftig ontken het.

"Ek dink eerlikheid is die beste opsie en dat die waarheid jou altyd sal bevry.

"Dit moet regtig moeilik wees om rond te loop, wetend dat jy nie die waarheid oor iets vertel nie. Ek glo altyd die waarheid is die beste uitweg."
     
– Volg Nuus24 op Twitter

- Sapa-DPA