Sangeres praat oor stilgebore baba

2013-02-20 11:31

Kaapstad – Die sangeres Helenè Bester het vir die eerste keer met die media gepraat ná sy na 'n swangerskap van 33 weke haar babadogtertjie in November verloor het.

Bester het in ‘n roerende onderhoud met Sarie gesê dat dit ‘n swaar tyd vir haar was.

“Al wat ek onthou, is dat sy vir my swaar was. En ek was ontsteld omdat die kombersie oud gelyk het (waarin sy troegdraai was),” het Bester oor haar dogtertjie, Anina, se stilgeboorte gesê.

Bester het bygevoeg dat sy nie die baba na die stilgeboorte wou sien nie, maar dat die susters van die hospitaal haar oorreed het dat dit nodig was om afsluiting te kry.

“Hulle het gesê dis sielkundig baie goed om jou baba vas te hou, want as jy weer nugter is en die lewe begin aanpak, gaan jy sleg voel omdat jy haar nie gesien het nie.”

Sy het ook gesê dat dit goed is om foto’s te neem omdat ‘n ma wil onthou hoe haar baba gelyk het.

“Jy dink dit sal vreemd lyk, maar sy het net gelyk soos ’n dogtertjie wat slaap.”

Bester moes bloedoortappings ontvang na die noodkeisersnee gedoen is.

Die volledige onderhoud sal in Sarie se Maart-uitgawe wees.

– Volg Nuus24 op Twitter