Sandra gaan vir oulaas weer in sepie verskyn
2010-01-16 10:25
Thinus Ferreira
Kaapstad - Sandra Prinsloo keer terug na Egoli.
Die gesoute aktrise sal weer haar verskyning gaan maak in haar sepierol as Cecile Sinclair – later Cecile Sinclair-Milner-Smythe – terwyl Egoli op M-Net ten einde snel.
Die Burger het betroubaar verneem dat Prinsloo volgende maand in Egoli herrys, hoewel M-Net by niks wou bevestig nie. Die Egoli-skepper, Franz Marx, het Prinsloo oorreed om vir oulaas weer haar ou rol op te neem.
Marx se plan is dat Egoli op ’n ongelooflike hoogtepunt moet groet met dramatiese storielyne. Dit begin in Februarie opbou soos die finale en laaste nuwe episode naderkom wat op Dinsdag 2 Maart op die betaalkanaal uitgesaai sal word.
“Egoli is mos nou al lankal klaar geskiet,’’ het Prinsloo eers probeer paai toe sy oor haar terugkeer na Egoli gevra is.
“Ek dink Franz Marx sal vir my woedend wees as ek enigiets weggee.’’
Ná 2 Maart wys Egoli spesiaal verpakte huldeblyk-episodes tot 26 Maart, wat die hoogtepunte uit die sepie gaan wys. Elke dag se episode sal oor een jaar se gebeure van die TV-reeks strek.
- Die Burger