SA'ners kan na Lance-onderhoud kyk

2013-01-14 12:04

Kaapstad – Suid-Afrikaanse kykers sal Oprah Winfrey se onderhoud met die omstrede fietsryer Lance Armstrong Vrydag, 18 Januarie op DStv se kanaal 172 en TopTV se kanaal 453 kan volg.

Dit sal Armstrong se eerste onderhoud wees sedert sy sewe Tour de France-titels verlede jaar by hom afgeneem is. Daar word wyd bespiegel dat hy sal erken dat hy wel opkikkers gebruik het.

Die onderhoud sal ook regstreeks op Winfrey se webtuiste, oprah.com, gewys word.

Kykers kan Vrydagoggend 04:00 na die onderhoud kyk op die webtuiste.

DStv sal die onderhoud Vrydagaand om 19:30 op kanaal 172 uitsaai.

Dit is egter nog nie bekend om watter tyd die onderhoud op TopTV te siene sal wees nie, het Channel24 berig.

Winfrey se onderhoud met Armstrong word Maandag by Armstrong se huis in Austin, Texas opgeneem.

The New York Times het verlede week berig dat die 41-jarige Armstrong dit oorweeg om te erken dat hy opkikkers gebruik het sodat hy weer aan mededingende sport soos marathons en driekampe kan deelneem.

Die Internasionale Fietsryvereniging (ICU) het Armstrong se naam laat verlede jaar effektief uit die geskiedenis van fietsry gewis toe die vereniging besluit het om nie appèl aan te teken teen 'n verdoemende verslag deur die Amerikaanse agentskap teen verbode middels (Usada) nie.

– Volg Nuus24 op Twitter