SABC3 wil meer nuwe Afrikaanse programme uitsaai
2010-11-22 08:15
Beeld
Kaapstad. – Daar is nie genoeg Afrikaans op TV nie, sê SABC3, met die openbare uitsaaier wat nou beplan om baie meer nuwe Afrikaanse kykstof in die toekoms uit te saai en ook te vervaardig.
Die rede hiervoor is die (koop)krag van Afrikaanse kykers wat Afrikaanse programme ondersteun en uitsaaiers in staat stel om hoër advertensietariewe te vra.
Dan is daar ook die toenemende Afrikaanse mededinging met algemene vermaakkanale soos kykNET op DStv en die nuwe kanaal ASTV, wat sedert Oktober op Top-TV beskikbaar is.
Dié kanaal se gewildheid is vinnig besig om toe te neem.
SABC3 is die SAUK se enigste kommersiële TV-kanaal en boonop hoofsaaklik Engels.
Die nuwe tweetalige ontbytprogram Expresso met aanbieders Liezel van der Westhuizen, Ewan Strydom en Michael Mol wat op weekoggende regstreeks vanuit Kaapstad uitgesaai word, is egter reeds baie gewild onder kykers.
Weens die sukses en positiewe kykerreaksie wil die uitsaaier nou nog meer Afrikaans op die uitsaaiskedule sit.
“Soos ons vorentoe beweeg, gaan ons baie Afrikaanse inhoud hê, want ons voel daar is nie genoeg Afrikaans op TV nie,” sê Risuna Mayimele, bemarkingshoof van SABC3.
“Wanneer jy kyk na ons nuwe ontbytprogram Expresso – daar was tot nou toe niks in daardie tydgleuf wat tot die Afrikaanse mark gespreek het nie. Daarom het ons hierdie leefstylprogram begin,” sê sy.
SABC3 het reeds verskeie Afrikaanse reekse by kykNET gekoop en sal volgende jaar voortgaan met hul strategie om op dié manier Afrikaanse kykers te lok.
“Donderdagaande saai ons klassieke Afrikaanse TV-dramas uit, maar ons gaan ook varser, nuut vervaardigde, kommersiële Afrikaanse inhoud hê wat aanklank vind by jong, moderne Afrikaanse kykers.
Dit (Afrikaans) is iets wat ons reeds baie gehelp het.
“In die toekoms gaan ons belê in nuwe Afrikaanse programme,” sê sy.
“Ons gaan ook meer ou klassieke reekse wys. Ons vind dat klassieke reekse werk. Mense wil dit steeds en weer sien, veral die jonger generasie wat dit nog nooit gesien het nie.”
Volg Nuus24 op Twitter