SABC sê nee vir Gareth, Unathi se onderhoud met Khaya

2012-10-04 13:07

Kaapstad – Gareth Cliff en Unathi Msengana sal nie onderhoude met die Idols-wenner Khaya Mthethwa op hul SABC-radioprogramme voer nie.

Sowetan Live het Donderdag berig Msengana, Metro FM-aanbieder en Idols-beoordelaar, is deur haar stasiebestuurder ingelig dat sy nie 'n onderhoud met Mthethwa mag voer nie.

Sy het aan die koerant gesê: "Vanoggend [Woensdagoggend] het my stasiebestuurder aan my gesê om nie 'n onderhoud met Khaya te voer nie. Geen verduideliking is gegee nie. Ek moes dit gehoorsaam en het geen vrae gevra nie omdat hy my baas is."

Kaizer Kganyago, woordvoerder van die SABC, het aan Channel24 gesê omdat daar geen bemarkingsooreenkoms tussen Idols en die SABC, wat Metro FM en 5FM besit, bestaan nie, sal dit 'n botsing van belange gaan wees indien die SABC onderhoude met Mthethwa voer.

"Die SABC het Unathi en Gareth se versoek om onderhoude met Khaya te voer, verwerp omdat dit 'n botsing van belange gaan wees."

Kganyago het gesê ander SABC radio-omroepers het onderhoude met Mthethwa gevoer en dat dié besluit slegs van toepassing is op Msengana en Cliff, wat 'n 5FM-platejoggie is.

Lani Lombard, M-Net se kommunikasiebestuurder, het aan Channel24 bevestig "geskeduleerde onderhoude vir die ontbytprogramme op 5FM en Metro FM is Dinsdagaand gekanselleer."

Daar was egter Woensdagaand 'n onderhoud met Mthethwa op Metro FM gevoer.

Msengana was nie vir kommentaar beskikbaar nie.
– Channel24