SA verloor ’n reus van die teater
2012-01-28 08:30
Kaapstad – “Sy het, soos die oumense gesê het, standing gehad.”
Só het die toneellegende Pieter Fourie Vrydag gesê toe hy hoor die bekroonde Suid-Afrikaanse dramaturg Reza de Wet is oorlede.
Leukemie is in Oktober 2011 by De Wet (59) gediagnoseer. Sy is Vrydagoggend in haar slaap in haar huis op Grahamstad dood. Sy was ’n baie private mens en het die laaste maande nie eens haar telefoon beantwoord nie. Twee niggies het haar help versorg.
“Sy was ’n skitterende aktrise, briljante regisseur en dramaturg met haar werk geanker in die vesel van die Afrikaner se geskiedenis. Maar sy had ’n Tsjechof-aanslag.
“Sy het daarin geslaag om die plaaslike lokale in werklikheid tot internasionale statuur te verhef. Dis ’n merkwaardige stem wat ons verloor... ”
De Wet is op Senekal in die Oos-Vrystaat gebore. Sy het ’n meestersgraad in die Engelse letterkunde met lof aan Unisa behaal en was tot 2007 professor in drama aan die Rhodes-universiteit op Grahamstad.
Roux Engelbrecht, ’n familievriend en kollega van Grahamstad, praat van haar sonnige karakter, haar lojaliteit en veral haar fynbesnaardheid.
“Sy hét ook ’n donker kant gehad, ja, maar dit het sy vir haar skryfwerk gelos.”
Die akteur André Stoltz, wat deur De Wet gevra is om as vervaardiger en regisseur op te tree van Mis, die toneelstuk wat vir gr.12 voorgeskryf is, vertel hoe sy “op ’n ander vlak kon kommunikeer”.
“Sy sou sommer vir jou sê Anton Tsjechof het pas by die kamer ingestap. Daar was iets van die mistikus omtrent haar.”
De Wet was familie van die digter Eugène Marais en het dikwels vertel sy het ’n besonderse band met Marais.
Haar uitgewer, Marietjie Coetzee-Malan, onthou juis die “magiese, en dikwels byna groteske kwaliteit van haar werk, waarvan Diepe Grond die eerste was”.
Sy het onder meer drie FNB Vita-toneelpryse, drie Fleur du Cap-toneelpryse, twee Hertzogpryse, ’n Rapport-prys en CNA-letterkundeprys gekry.
Sy word oorleef deur haar man, Lindsay Reardon, dogter, Nina van Schoor, en twee kleinkinders.
– Volg Nuus24 op Twitter
- Die Burger