SA popgroep Eden spat uiteen
2011-02-04 08:43
Kaapstad - Die popgroep Eden gaan vir eers net tot einde April saam optree. Daarna gaan elke lid van die groep sy eie pad stap – net om einde vanjaar weer saam te kom.
Maar, verseker hulle Donderdag, dit beteken hoegenaamd nie dat Eden permanent uitmekaar gaan spat nie. Hulle gaan selfs nog volgende jaar ’n Eden-CD uitreik.
Die hoofsanger, Jay, sê dinge gaan deesdae vir die drie lede van die groep “net doodeenvoudig te dol en ons moet onsself ’n kansie gee om asem te skep”.
“Jy moet onthou dat Eden al 11 jaar bestaan. Ons moet nou ’n bietjie rus, in die spreekwoordelike sin. In die letterlike sin gaan ons juis nié rus nie. Ek self gaan landwyd solo toer ná my eerste solo-album verlede jaar.
“Intussen werk ek, Paul (Asevedo) en Johan (Vorster) ook nog aan ’n nuwe Eden-album wat ons aanstaande jaar wil uitreik. Dus, ons gaan geskei wees wat fisiese openbare shows betref, maar dit is omtrent al.”
Jay se album, Solo, vat-vat aan platinumstatus (verkope van minstens 40 000).
Asevedo sê daar is geen sprake van ’n permanente breuk nie. “Almal gaan net ná April op ander projekte fokus. Ons beplan trouens groot optredes einde vanjaar as Eden.”
Eden het in sy bestaan reeds verskeie toekennings in die musiekbedryf gewen.
- Volksblad