SA musieklegende benoem vir 'n Grammy
2012-12-06 10:14
Los Angeles – Die Suid-Afrikaanse trompetspeler en komponis Hugh Masekela is benoem vir 'n Grammy in die kategorie vir die beste wêreldmusiek-album, is Woensdagaand aangekondig.
Masekela se album Jabulani is benoem vir dié toekenning. Die album is in 2010 vrygestel en is Masekela se eerste album sedert 2002.
Ses ander kunstenaars het elk vyf Grammy-benoemings ontvang, wat dit 'n taai stryd maak vir die gesogte toekennings in die Amerikaanse musiekbedryf.
Die Indie-rockgroep Fun, wie se liedjie "We Are Young" vanjaar trefferlyste oorheers het, is Woensdag benoem in kategorieë vir ondermeer die beste nuwe kunstenaar, liedjie, en album van die jaar vir Some Nights.
Kanye West en Jay-Z het ook vyf benoemings ontvang, sowel as die R&B-ster Frank Ocean, Dan Auerbach van The Black Keys en die countrygroep Mumford & Sons.
Ocean is in drie van die topvier-kategorieë benoem: beste nuwe kunstenaar, liedjie van die jaar ("Thinkin' About You") en album van die jaar vir sy Channel Orange.
Ander kunstenaars wat benoem is vir liedjie van die jaar is The Black Keys, Kelly Clarkson, Gotye en Taylor Swift.
Kunstenaars wat ook meeding in die kategorie vir album van die jaar is The Black Keys met El Camino, Mumford & Sons met Babel en Jack White met Blunderbuss.
Clarkson se Stronger, Ceremonials van Florence + the Machine, Some Nights deur Fun., Maroon 5 se Overexposed en Pink se The Truth About Love is benoem vir popalbum van die jaar.
Die toekenningseremonie word op 10 Februarie in Los Angeles gehou.
– Volg Nuus24 op Twitter
- Sapa-DPA
