Ryk: Charlene sê ‘daar is niks fout’
2011-06-29 14:52
Johannesburg – Die Suid-Afrikaanse swemmer Ryk Neethling het aan plaaslike media gesê alles is op dreef vir Charlene Wittstock se troue aan prins Albert II van Monaco.
Dít kom nadat daar vroeër berig is dat Wittstock glo koue voete gekry het en na Suid-Afrika wou terugkeer.
Neethling, wat die troue Vrydag en Saterdag gaan bywoon, sê hy het Wittstock gebel nadat die Times koerant in Suid-Afrika hom gebel het om gerugte te bevestig dat sy Monaco wou verlaat.
“Ek het met haar assistent gepraat en wat die storie ookal is, dit is nie die waarheid nie. Ek sal baie verras wees indien dit waar moet wees. Ek het gebel om te hoor of alles okay is en ek was verseker dat daar niks fout is nie.”
Neethling het gesê hy vlieg steeds na Monaco vir die troue.
Die paleis in Monaco het Dinsdag dié gerugte ten sterkste ontken wat deur ‘n Franse tydskrif L'Express berig is. Volgens dié tydskrif het Wittstock verlede week probeer om ‘n vlug terug na Suid-Afrika te kry.
– Volg Nuus24 op Twitter.
- AFP