Rolstoelrugby maar rof, sê TV-ster
2010-08-16 07:14
Die Burger
Pretoria - Rolstoelrugby is rof!
Dit het Heino Schmitt, beter bekend as 7de Laan se Altus de Bruyn, gister besef toe hy saam met gestremdes rolstoelrugby gespeel het.
Schmitt het saam met die rugbyspelers in rolstoele aan ’n wedstryd deelgeneem en het by tye gespartel om by te bly.
Die wedstryd is op die Universiteit van Pretoria se Groenkloof-kampus gehou.
Yvette van der Westhuizen, die spanbestuurder, het gesê dit is gehou om mense bewus te maak van die sport en om toekomstige borge te lok.
“Die sportsoort het sy oorsprong in 1977 in Kanada gehad en is vandag baie gewild onder kwadrupleë. Mense met ’n geamputeerde been kan ook aan die sport deelneem. Daar is verskeie maniere waarop liggaamlik gestremde mense gekeur kan word vir rolstoelrugby. Vroue is ook welkom om deel te neem,” het Van der Westhuizen gesê.
Amalia Uys (San-Mari), Melanie du Bois (Felicity) en Theodore Jantjies (Xander) van 7de Laan was ook Sondag by dié wedstryd om hul ondersteuning te wys.
Luan Degenaar (43), ’n rolstoel-kragman van Brits wat self ’n kranige rugbyspeler is en al vir die Amakroko-rugbyspan gespeel het, het vir opwinding gesorg toe hy ’n Nissan Hardbody-bakkie 20 meter ver teen ’n opdraande getrek het.
Volg Nuus24 op Twitter
- Die Burger