Rolprentspan sê jammer
2009-10-02 12:32
Taipei, Taiwan – Die span van die Hollywood oordeelsdag-rolprent “2012”, het Vrydag hul simpatie getoon met die slagoffers van natuurrampe wat hierdie week lande in die Stille Oseaan geruk het.
Die rolprent sal in November vrygestel word en is op ‘n Majakultuur waarsegging baseer. Volgens dié waarsegging sal ‘n reuse katastrofe die aarde in die jaar 2012 tref.
"Sekere dinge in die film was besig om in die regte lewe te gebeur. Ons harte gaan uit na dié wat deur die rampe getref is,” het Harald Kloser, mede-vervaardiger van die rolprent, gesê.
‘n Storm wat deur die Filippyne, Vietnam, Kambodja en Laos beweeg het, het hierdie week meer as 400 slagoffers geëis.
Meer as 600 mense is dood toe ‘n tsoenami in die Stille Oseaan die eilande van Amerikaans-Samoa, Samoa en Tonga getref het, terwyl nog 700 lewens geneem is toe ‘n aardbewing Woensdag Indonesië se Sumatra-eiland geruk het.
John Cusack, wat in die rolprent speel, sê "2012" se mikpunt is nie om rampe uit te buit nie maar eerder om uit te wys hoe mense kan uitstyg bo hulle verwagtinge.
Roland Emmerich, die rolprent se regisseur, sê hy hoop die rolprent kan mense oortuig om meer tyd saam met hulle gesinne deur te bring en die belangriker dinge in die lewe raak te sien.
- Sapa-AP