Rolling Stones stel ou liedjies bekend
2010-02-26 11:02
Los Angeles – Nadat die Rolling Stones vir jare huiwerig was om ou liedjies uit die argiewe af te stof en op ‘n album vry te stel, gaan hul nou 10 snitte die lig laat sien wat nog nooit voorheen gehoor is nie.
Die album sal ‘n hervrystelling van hul album Exile On Main Street wees, wat oorspronklik in 1972 vrygestel is en as van hul beste werk beskou word.
Die 10 bonus-snitte uit hul argiewe sal ook nuwe liedjies soos 'Plundered My Soul', 'Dancing In The Light', 'Following The River' en 'Pass The Wine' insluit.
Die hoofsanger Mick Jagger was aanvanklik huiwerig om die ou, onbekende liedjies bekend te maak aangesien hy die Britse groep, wat sedert 1962 in die musiekbedryf is, as ‘n kontemporêre groep eerder as ‘n nostalgiese een beskou.
Die unieke album sal ook ‘n dokumentêre TV-program, Stones in Exile, insluit, wat skaars beeldmateriaal en foto’s bevat asook nuwe onderhoude.
- Reuters