Rolling Stones rock binnekort in Londen, New York
2012-10-15 15:11
Londen – Die Rolling Stones sal twee konserte in Londen en twee naby New York hou om hulle 50ste bestaansjaar te vier, het die groep Maandag aangekondig.
Die Britse groep, een van die suksesvolste rockgroepe ooit, sal op 25 en 29 Novermber in die O2 Arena in Londen speel. Hulle sal later, op 13 en 15 Desember, ook by die Prudential Center in Newark te sien wees.
"Jammer om julle almal te laat wag, maar die wag is nou verby," het Keith Richards, wat kitaar speel vir die groep, gesê. Gerugte dat die Stones 'n herdenkingstoer reël doen al geruime tyd die ronde.
"Ek het nog altyd gesê die beste plek vir rock is op die verhoog en dieselfde is waar vir die Stones," het hy bygevoeg. "Ek is hier met Mick, Charlie en Ronnie en alles rock. Sien julle binnekort!"
Richards, sy mede-kitaarspeler Ronnie Wood, die sanger Mick Jagger en Charlie Watts, die tromspeler, sal op 'n verhoog speel wat ontwerp is om te lyk soos die groep se bekende tong-en-lippe-kenteken.
Die groep sal ook 'n album, getiteld GRRR!, vrystel om hulle 50ste bestaansjaar te vier.
– Volg Nuus24 op Twitter.
- Reuters
