Roerende ‘Hopeville’ gou in SA fliekteaters
2010-07-29 09:06
Toe die reeks Hopeville verlede jaar op SABC2 vertoon is, het ’n mens dadelik besef dit is ’n aangrypende storie.
Die reeks het ’n mens diep geroer en jou die hartseer en verlatenheid van die inwoners van dié dorpie laat beleef. Dié verhaal word op 3 September as ’n rolprent in Suid-Afrikaanse teaters uitgereik.
Hopeville handel oor Amos Manyani (Themba Ndaba), ’n rehabiliterende alkoholis, wat na ’n afgeremde gehuggie trek in die hoop om ’n nuwe lewe daar vir hom en sy vervreemde seun, Themba (Junior Singo), te gaan uitkerf.
Dinge is egter nie so eenvoudig nie. Buiten vir die probleme met ’n korrupte burgemeester wat alles vir eie gewin doen en die inwoners van die dorpie se gees in die proses breek, moet Amos sy seun se respek herwin en die donker geheime van die gemeenskap en sy apatiese houding trotseer.
Talle bekende name in die Suid-Afrikaanse vermaakbedryf is in Hopeville se rolverdeling te sien.
Desmond Dube is die korrupte burgemeester, Patrick Gumede; Jody Abrahams is te sien as PJ Daniels, ’n hardvogtige sakeman wat sonder huiwering by twyfelagtige saketransaksies betrokke raak; en Paul Luckhoff is Felix Venter, wat beskou word as die rassis in die dorp.
Ander akteurs is onder andere Leleti Khumalo, Fana Mokoena, Terry Pheto van Thotsi-faam, Jonathan Pienaar en Wilmien Rossouw.
- Hopeville die televisiereeks is benoem in die kategorie vir drama- en minireekse op die toonaangewende Rosee d’Or-televisiefees – ’n belangrike geleentheid in die internasionale televisie-arena.
Die wenners word in September aangewys.
- Beeld