Rockster se eks pleeg glo selfmoord
2010-01-11 15:50
Bordeaux – Bertrand Cantat, 'n Franse rockster en veroordeelde moordenaar, is deur die polisie ondervra nadat sy voormalige vrou haarself glo in haar huis gehang het, het owerhede Maandag gesê.
Cantat is in 2003 van die moord op Marie Trintignant, sy destydse vaste vriendin en ook ‘n aktrise, skuldig bevind.
Hy is tronkstraf van agt jaar opgelê en is in 2007 op parool vrygelaat.
Amptenare het gesê Cantat was aan die slaap in sy huis in Bordeaux toe Kristina Rady (41) haarself gehang het.
Die paartjie het twee kinders gehad. Hulle was nie tydens haar dood teenwoordig nie, maar een van die kinders het haar liggaam die Sondagmiddag ontdek.
Die 45-jarige sanger is Sondagaand deur die polisie in Bordeaux ondervra, maar geen stappe is toe teen hom geneem nie.
‘n Nadoodse ondersoek is Maandag uitgevoer.
Rady, ‘n skrywer en verhoogaktrise, het gedurende haar eks-man se verhoor ter sy verdediging getuig en gesê dat hy nooit tydens hulle huwelik gewelddadig teenoor haar opgetree het nie.
-Sapa-AFP