Rockster jammer oor Idols-bohaai
2012-11-29 09:20
Los Angeles – Die rockster Steven Tyler het Nicki Minaj om verskoning gevra nadat sy hom daarvan beskuldig het dat hy 'n rassistiese uitlating teenoor haar gemaak het.
Die Aerosmith-sanger, wat vroeër vanjaar as 'n beoordelaar op American Idol bedank het, het vroeër vandeesweek in 'n geveg op Twitter betrokke geraak met Minaj.
Tyler het gesê die "Starships"-sangeres sal nie die volgende groot kunstenaar kan raaksien nie, al staan hy voor haar op die verhoog.
Minaj, Mariah Carey en Keith Urban is nuwe beoordelaars op die program nadat Tyler en Jennifer Lopez bedank het.
Die 64-jarige Tyler het in ‘n onderhoud met MTV News gesê as Bob Dylan ‘n oudisie moes doen, sou Minaj hom na die “koringlande” gestuur het.
Minaj het getweet dat Tyler se uitlatings rassisties is en dat hy bitter is omdat sy sy werk gevat het.
“Ek verstaan dat jy graag jou werk wou hou, maar dit moet jy met die vervaardigers bespreek. Ek het niks aan jou gedoen nie. Dit is rassistiese kommentaar,” het Minaj getweet.
Tyler het gesê sy bedoeling was nooit om Minaj te beledig nie en het ook benadruk dat hy nie 'n rassis is nie.
"Ek weet nie hoe sy dit gekry het toe ek gesê het hoe Bob Dylan in sy oudisie sou vaar nie. Dalk het ek uit my beurt gepraat, maar 'n rassis is ek nie, Nicki."
– Lees meer hier
– Volg Nuus24 op Twitter
