Rian sê ekskuus vir Nuwe Hoop
2012-02-09 08:00
Pretoria – Rian van Heerden, nuwe Jacaranda 94.2-omroeper, het Woensdag op die lug om verskoning gevra omdat hy geïmpliseer het “breindooie” mense gaan na die Nuwe Hoop-skool in Pretoria.
Sy aanmerkings het talle klagtes ontlok, het Jenny Griesel van die radiostasie gesê.
Dawie Harmse, hoof van Nuwe Hoop, het bevestig dat ’n klag by die Uitsaaiklagtekommissie van Suid-Afrika (UKKSA) ingedien is.
Dié skool onderrig leerlinge met serebrale gestremdheid, fisieke gestremdhede, metaboliese afwykings of sindrome en ernstige spesifieke leergestremdhede.
Van Heerden het Dinsdag ’n kompetisie tussen die nuwe YouTube-sensasie André van Wyk met sy liedjie “My taal” en ’n fiktiewe Sixteen (7), dogter van Yo-Landi Vi$$er van Die Antwoord, van stapel gestuur.
Die fiktiewe Sixteen het ’n liedjie met talle skelwoorde, wat uitgedoof is, gesing. Lesers kon vir die beste liedjie stem.
’n Luisteraar wou toe per e-pos weet hoekom die woorde uitgedoof is. Dit is skadelik vir kinders omdat hulle die woorde in elk geval kan raai, lui die e-pos.
Van Heerden het Woensdag in sy verskoning gesê: “Ek het uit frustrasie gesê: ‘Ek wens mense wil verder as hul neuse leer dink en na ’n instelling gaan wat hulle leer om hul brein beter aan te wend.’
“Ek het na breindooie mense verwys. Die eerste instelling wie se naam in my kop gekom het, was dié van die Nuwe Hoop-skool. Daardeur het ek geïmpliseer dat breindooie mense na die Nuwe Hoop-skool gaan. Dit is glad nie waar nie. Baie kinders met fisieke gestremdhede woon ook dié skool by. Daarom bied ek my onvoorwaardelike verskoning aan.
“Ek het nie besef hoe my woorde mense by dié skool geraak het totdat een van my oudste en beste vriendinne ’n klag by Jacaranda ingedien het nie. Haar kind is ’n leerling aan die Nuwe Hoop-skool en sy het gesê sy was so kwaad, sy was in trane,” het Van Heerden gesê.
– Volg Nuus24 op Twitter
- Beeld