Rian: Stasie beboet met R30 000
2012-03-29 09:06
Johannesburg – Rian van Heerden se opmerking oor “breindooie mense” in verband met die Nuwe Hoop-skool in Pretoria kos Jacaranda 94.2 nou R30 000.
Die Uitsaaiklagtekommissie van Suid-Afrika (UKKSA) het ook bevind Jacaranda moet in twee nuusbulletins, waarvan een die hoofbulletin om 07:00 moet wees, om verskoning vra omdat Van Heerden die Beweging vir Christelike Volkseie Onderwysskole (BCVO) afgekraak het.
Prof. Kobus van Rooyen, voorsitter wat die klagte aangehoor het, het twee klagte uitgegooi en Jacaranda op twee klagte skuldig bevind.
Van Rooyen het gesê Van Heerden se opmerking dat “breindooie mense na die Nuwe Hoop-skool moet gaan” tas die leerlinge se waardigheid erg aan.
Die stasie is nie met die maksimum van R60 000 beboet nie omdat die uitsaaier berou getoon het en reeds verskoning oor die lug gemaak het.
Die uitsaaier skuld die BCVO ook twee verskonings weens ’n draakstekery met leerlinge se 95%-matriekslaagsyfer.
Van Heerden het gesê matrieks moet twee vrae antwoord om hul eksamen te slaag: “Wie is Hendrik Frensch Verwoerd? Antwoord: eerste minister. Korrek. Wie regeer die land? Antwoord: die kommuniste. En as hulle kommuniste reg spel, ontvang hulle ’n onderskeiding.”
Volgens Van Rooyen is die verskoning van satire nie voldoende nie.
– Volg Nuus24 op Twitter
- Beeld
