Riaan vir boek én troureëlings in Bfn
2012-04-12 07:01
Die veteraan-nuusleser Riaan Cruywagen (67) was nie net Dinsdag in Bloemfontein om sy nuwe boek Wat’s Nuus? bekend te stel nie. Hy het ook die troukaartjies vir sy dogter se aanstaande skoonfamilie in die Rosestad gebring.
Cruywagen en sy vrou van 41 jaar, Riana, se enigste kind, Anita, trou op 14 Julie met Nardo Bornman, ’n oud-Bloemfonteiner wie se gesin nog hier woon.
Oor die troue van sy kind sê Cruywagen: “Ek is bly my dogter trou met ’n Vrystater, ’n man van goeie stoffasie.”
Cruywagen se ma, Christie, was ook ’n Vrystater. Sy is op Lindley gebore.
Bornman, ’n nywerheidsontwerper en projekbestuurder, sê hy het nie geweet wie Anita se pa is toe hulle in Johannesburg deur ’n gemeenskaplike vriendin aan mekaar voorgestel is nie.
Hy dink sy aanstaande skoonpa is ’n merkwaardige man met interessante stories.
Dit sal albei se tweede huwelik wees.
Anita, ’n onderwyseres, se kind, Tiaan Hatting, en Bornman se kind, Emma, is in dieselfde skool. Hulle is albei vier-en-’n-half en is beste maatjies.
“Hulle is soos ’n tweeling,” sê Nardo.
Hy sê hy en Anita is baie opgewonde oor die troue.
“Anita het sover die meeste van die reëlings getref; ek probeer maar help waar ek kan.”
Sy aanstaande skoonpa het die troukaartjies vir sy ma, Rita, en broer, Conrad, saamgebring.
Talle Bloemfonteiners het die boekbekendstelling in Mimosa Mall bygewoon en geluister na Riaan en ds. Petrus Kühne, van die NG gemeente Universitas-Wes, se gesprek oor die boek. Kühne het namens die uitgewer Naledi met Riaan gepraat oor sy boek, sy lewe en loopbaan.
Johnny le Roux, nasionale bemarkingsbestuurder van Naledi, sê die eerste oplaag van 10 000 boeke is uitverkoop nog voordat die boek verskyn het.
Cruywagen, wat in Maart verlede jaar met die skryf daarvan begin het, sê: “Dit is wonderlik om hom (die boek) in my hande te hê; ek moet hom nou nog net lees.”
– Volg Nuus24 op Twitter
- Volksblad
