Riaan sal aftree 'wanneer hy dit perfek kry'
2012-04-03 06:40
Oudtshoorn – Sy oorle’ ma het altyd gesê: Jy klim nie in ’n bad met skamel geklede meisies tensy jy ordentlik aangetrek is nie.
Só het die veteraan-nuusleser Riaan Cruywagen (67) Maandag op die RSG-verhoog by die Absa KKNK geskerts.
Cruywagen het verwys na die onlangse advertensie wat die Loerie-toekennings adverteer. Hy sit met pragtige, halfkaal meisies in ’n borrelbad, maar is self “ge-collar en ge-tie”.
Cruywagen is op die Volstruisdorp om sy nuwe boek, Wat’s nuus , bekend te stel. Hy het ná 37 jaar as Afrikaanse nuusleser op SABC2 en altesame 47 jaar in die uitsaaiwese besluit om sy lewensverhaal neer te pen.
Dit is ook Cruywagen se heel eerste besoek aan die KKNK, “want Johannesburg is mos maar ’n bietjie ver”.
Die RSG-tent was stampvol en daar is by tye geskaterlag vir Cruywagen se grappies, stories en staaltjies. “Hy is immers Suid-Afrika se bekendste nuusleser ooit!” het iemand in die gehoor laat hoor.
Cruywagen het gesê iets bly hom by van bykans elke nuusbulletin wat hy lees. “As nuusleser is jy nie ’n masjien nie; jy is ook ’n mens van vlees en bloed. Dit is belangrik om te kan onderskei tussen emosie en deernis.”
Johan Rademan, RSG-aanbieder, wou by Cruywagen weet hoe hy voel oor die humoristiese status wat hy veral onder jong mense gekry het.
Cruywagen het laggend geantwoord dit is ’n “wonderlike afwisseling” van die ernstige nuus lees.
“Toe die regisseur van die advertensie my aanvanklik gebel het, het ek gedink hy gaan my superponeer.
“Hulle was toe ernstig oor die storie. Toe ek daai pak aangetrek en vier uur later eers uitgeklim het, was die pak vier keer kleiner.”
En die vraag van alle vrae is ook aan hom gestel: Wanneer gaan Riaan Cruywagen ophou nuus lees?
“Ek oefen nou al 37 jaar lank om die nuus te lees en die dag wanneer ek dit perfek kry, gaan ek ophou.”
– Volg Nuus24 op Twitter
- Die Burger
