Riaan Cruywagen tree uit

2012-11-02 07:39

Johannesburg – Die alombekende televisie-nuusleser Riaan Cruywagen sal ná 37 jaar op die kassie uittree, het Beeld Vrydag berig.

“Hy is al 67. Hy tree af,” het Jimi Matthews, waarnemende uitvoerende groephoof van nuus en aktualiteit by die SAUK, bevestig.

“Dit sal Maandag 26 November op die dag en datum 37 jaar wees nadat hy by die SAUK begin werk het.”

Cruywagen self sê hy sien uit na dié nuwe fase in sy lewe.

“Ek is eintlik heel rustig oor die hele (aftree-)besigheid. Dit is beslis nie ’n besluit wat ek ligtelik geneem het nie, want ek geniet my televisie-loopbaan terdeë," het hy volgens die dagblad gesê.

"Ek glo dat dit seker baie hartseer [sal] wees om my laaste aanbieding te doen – alhoewel ek dink dat daar seker heelwat minder adrenalien as tydens my eerste aanbieding 37 jaar gelede ter sprake sal wees.”

Cruywagen het tydens sy loopbaan meer as 7 000 televisie-aanbiedinge gedoen.

Kyk hier na 'n video van een van Cruywagen se grootste oomblikke op die kassie, en laat jou boodskap vir dié legende in die kommentaarvenster hieronder. Jy kan ook 'n bydrae stuur na [e-mail].



– Lees hier meer.

– Volg Nuus24 op Twitter.