The Hobbit gereed, maar regstryd dreig

2012-11-21 10:51

Los Angeles – Die rolprentreus Warner Bros. het geweier om kommentaar te lewer ná regsverteenwoordigers van die skrywer JRR Tolkien se boedel die maatskappy gedagvaar het omdat hy na bewering sy regte vir handelsware van The Lord of the Rings en The Hobbit misbruik.

Tolkien-regsverteenwoordigers eis $80 miljoen (sowat R711 miljoen) se skadevergoeding van Warner Bros. omdat die maatskappy na bewering die voorwaardes van 'n ooreenkoms oortree het wat hom toelaat om geld te verdien uit handelsware wat met die skrywer se werk verbind word.

Die regsaksie kom minder as ‘n maand voor die eerste The Hobbit-rolprent vrygestel word.

“Die oorspronklike ooreenkoms het Warner nie die reg gegee om elektroniese of digitale media te gebruik om die handelsware te verkoop nie,” het 'n verklaring gelui.

‘n Woordvoerder van Warner Bros het in reaksie gesê die maatskappy sal in dié stadium nie oor die saak kommentaar lewer nie.

The Hobbit: An Unexpected Journey sal volgende week die eerste keer in Wellington vertoon word.

– Volg Nuus24 op Twitter
 

- Sapa - AFP