Regisseur skei ná verhouding met Kristen Stewart

2013-01-29 07:05

Los Angeles – Die regisseur Rupert Sanders se vrou van die afgelope nege jaar, Liberty Ross, het hom om 'n egskeiding gedagvaar.

Dít volg vyf maande nadat sy buite-egtelike verhouding met die aktrise Kristen Stewart op die lappe gekom het.

Ross het Vrydag dokumente in Los Angeles ingedien en onversoenbare verskille as rede vir die egskeiding aangevoer. Die paartjie het 'n agtjarige dogter en 'n sesjarige seun saam.

Die model-aktrise soek gesamentlike toesig oor die kinders en 'n toelaag van haar vervreemde man, wat die regisseur was van die film Snow White and the Huntsman.

Die skinderwebwerf TMZ, wat die nuus oor Sanders se buite-egtelike verhouding aan die wêreld bekend gemaak het, berig dat Sanders ook egskeidingsdokumente ingedien het, maar dit was nie Maandag beskikbaar nie.

Stewart, wat in 'n verhouding is met die akteur Robert Pattinson, het in Julie verlede jaar om verskoning gevra vir haar verhouding met Sanders.

– Volg Nuus24 op Twitter

- Sapa - AP