Regisseur dood in Jhb-hotelkamer gevind
2013-01-08 09:54
Los Angeles – David R Ellis, voormalige waaghals en regisseur van die rolprent Snakes on a Plane, is in die ouderdom van 60 dood in 'n hotelkamer in Johannesburg gevind.
Ellis se bestuurder, David Gardner, het sy dood Maandag bevestig.
Ellis was in die stad om te werk aan Kite, 'n nuwe weergawe van 'n Japanse animasierolprent van 1998, waarin Samuel L Jackson die hoofrol vertolk.
Gardner wou nie enige verdere inligting bekend maak nie, en die oorsaak van Ellis se dood is nie bekend nie.
"So hartseer om van David R Ellis se afsterwe te hoor!" het Jackson Maandag op sy Twitter-profiel geskryf. Hy het ook geskryf dat Ellis talentvol is, en het hom as 'n "goeie vriend" beskryf.
Ellis was ook die regisseur van rolprente soos Shark Night 3D, The Final Destination, Cellular en Final Destination 2.
Hy word oorleef deur sy vrou en drie kinders.
– Volg Nuus24 op Twitter.
- AP
