Redakteur kry doodsdreigemente oor foto's van Kate

2012-09-24 22:37

Parys – Die Franse tydskrif Closer het Maandag gesê sy redakteur, Laurence Pieau, het doodsdreigemente ontvang nadat sy foto’s van Prince William se vrou Catherine gepubliseer het waar so sonder ‘n bostuk in die son gelê het.

“Ons het meer as 300 beledigende e-posse ontvang waarvan verskeie doodsdreigemente bevat,” het Closer gesê.

Die tydskrif het die polisie hiervan ingelig.

Veertien van die mees gewelddadige boodskappe wat aan Pieau geadresseer was, is aan die polisie oorhandig. Een het voorgeneem om “haar nooit in vrede te laat nie”.

Nadat dit in die Franse tydskrif verskyn het, het die foto’s van die hertogin van Cambridge in tydskrifte in Denemarke en Swede, Ierland se Daily Star en Italië se Chi verskyn.

Die foto’s is geneem terwyl die koninklikes in die suide van Frankryk op vakansie was.

Nadat die foto’s gepubliseer is, het Pieau hulle verdedig deur te sê hulle was glad nie skokkend nie.

“Hulle wys ‘n jong vrou wat sonder ‘n bostuk in die son lê, soos miljoene ander vroue wat jy op strande sien,” het sy aan AFP gesê.

Franse regsamptenare het Closer verbied om die foto’s verder te versprei en het ‘n kriminele ondersoek begin in hoe dit bekom is.

Die hof het die tydskrif ook beveel om die lêers met die foto’s aan die koninklike paartjie te oorhandig, wat die publikasie gedoen het.

Closer sê hy besit nie die foto’s nie en het dit slegs gekoop om dit eksklusief eerste te kan gebruik, so die tydskrif besit waarskynlik nie al die oorspronklike foto’s nie.

Die tydskrif weier om te sê by wie hy die foto’s gekoop het of wie die fotograaf was.

– Volg Nuus24 op Twitter

 

- AFP