Rauch en Torr skep eerste musiekspel
2011-03-22 08:48
In Desember 2009 het Laurika Rauch en haar man, Christopher Torr, saam met hul vriende Johan en Alma Badenhorst gaan uiteet.
Alma het vertel hoe lief haar kinders vir die Abba-musiekspel Mamma Mia! is. Hierop het sy spontaan na Torr gedraai en gesê: “Jy weet, jy moet ’n musiekspel skryf.”
Die idee is net daar gebore en toe hulle daardie aand by die huis kom, het Torr aan’t skryf gegaan vir die produksie Stuur groete aan Mannetjies Roux, wat in Mei in Pretoria op die planke sal wees en daarna deur die land sal reis.
“Mense moet egter nie dink dit gaan presies soos Mamma Mia! wees nie,” waarsku Torr.
“Dit is nie ’n dans-extravaganza nie.” Dit handel ook nie oor die rugbylegende nie.
In die musiekspel sal grotendeels gesteun word op van Rauch se bestaande, grootste treffers wat deur Torr geskryf is.
Daar is egter ook enkele nuwe verrassings.
Die storie speel hom af op ’n Karooplaas. ’n Jong meisie, Engela, besoek haar oom-hulle se plaas. Daar ontmoet sy die geheimsinnige vreemdeling Toemaar, wat met sy donkie op die plaas aankom. Laurika vertel haar Engelssprekende man en lektor in ekonomie was allesbehalwe ’n liedjieskrywer toe sy met hom getroud is, maar later het hy vir van haar mooiste en gewildste liedjies soos “Stuur groete aan Mannetjies Roux” en “Die gang” gesorg.
Ander liedjies wat onder meer in die musiekspel ingewerk is, is “Die ballade van Jakob F de Beer” en “Ou tante Koba”.
“Wat die liedjies gemeen het, is dat dit almal oor die Karoo is,” sê Torr.
Hy het immers die Karoo in sy bloed. Hy is in Graaff-Reinet gebore en het op ’n plaas grootgeword.
Dit was vir hom van meet af aan belangrik dat die liedjies deel vorm van die storielyn en dus ’n deel van die storie vertel wat nie weer in dialoog herhaal sal word nie.
“Ek hoop mense sal verbaas wees oor die nuwe interpretasies wat daaruit kom.”
Paul Eilers is die regisseur en in die rolverdeling is name soos Ilse Klink, Isadora Verwey, Deon Lotz, Steffie le Roux, Nicole Holm en Eben Genis.
Rauch, wat ’n dramagraad het, sal die rol van ’n verteller vertolk.
Mannie Manim, ’n bekende in teaterkringe, sorg vir die beligtingsontwerp en Kosie Smit het die stel ontwerp.
Johan Badenhorst is die vervaardiger en Torr die medevervaardiger.
Janine Neethling sal saam met Clinton Zerf die musiekregie behartig.
Om getroud te wees en saam aan hierdie produksie te werk, is vir Rauch en Torr nie ’n struikelblok of twispunt nie.
Rauch vertel dat sy Torr “100% vertrou” en hom toelaat om sonder enige inmenging van haar kant aan die teks te skryf.
“Om die waarheid te sê, het ek nog skaars die finale teks onder oë gehad!”
Sy en die span akteurs begin volgende maand repeteer.
Dit is vir Torr en Rauch ’n eerste om aan ’n musiekspel van hierdie aard te werk en dit is ’n uitdaging, sê Torr.
Dit was vir hom met die skryf daarvan veral belangrik om nie te veel te herhaal nie en dat die liedjies werklik deel word van die storielyn.
“Dit is ’n storie met ’n lag en ’n traan. Soos die lewe,” sê Torr.
Stuur groete aan Mannetjies Roux is van 23 Junie tot 3 Julie in Kaapstad se Kunstekaap.
Kaartjies by Computicket.
- Die Burger