Rapper stamp sy Rolls Royce ná skote klap

2013-01-29 09:15

Fort Lauderdale – Die kletsrymer Rick Ross het Maandag met sy Rolls Royce in ‘n gebou vasgery ná hy skote naby hom hoor klap het.

Polisiebeamptes in Fort Lauderdale sê Ross en sy metgesel, die mode-ontwerper Shateria L. Moragne-el, het gesê hulle het verskeie skote naby hulle hoor klap.

Ross het daarna glo beheer oor sy silwer Rolls Royce verloor en in ‘n woonstelgebou vasgery. Niemand is in die ongeluk beseer nie.

Die polisie het bygevoeg dat geen skote die Rolls getref het nie. Beeldmateriaal wys egter ‘n gat in ‘n ruit by ‘n restaurant, wat blykbaar deur 'n koeël veroorsaak is.

Ross, oftewel William L. Roberts, het Maandag 37 jaar oud geword.

Niemand is in verband met die voorval in hegtenis geneem nie.
 
– Volg Nuus24 op Twitter

- Sapa - AP