Randy sê ook totsiens aan American Idol

2012-08-31 14:53

Los Angeles – Randy Jackson sal nie meer ‘n beoordelaar op die gewilde realiteitsprogram American Idol wees nie.

Jackson is al sedert die program se begin in 2002 ‘n beoordelaar. Gerugte doen die ronde dat hy wel by die program sal aanbly, maar in ‘n ander posisie, het Yahoo News berig.

TMZ berig dat Jackson glo klaar ingestem het om as mentor vir die program se personeel op te tree.

Die ander twee beoordelaars, Steven Tyler en Jennifer Lopez, het ook vroeër vanjaar bevestig dat hulle nie meer vir die program beskikbaar sal wees nie.

Mariah Carey is klaar bevestig as een van die nuwe beoordelaars.

Volgens gerugte gaan die sangeres Nicki Minaj ook een van die beoordelaars op die nuwe seisoen van die program wees.

Die vervaardigers van die program het bekend gemaak dat daar vanjaar vier beoordelaars op die program sal wees, in plaas van drie.

P. Diddy en Kanye West is ook al met die program verbind, maar stel glo nie meer belang nie. Ander name wat genoem word sluit in Keith Urban, Nick Jonas, Enrique Iglesias en Pharrell Williams.

– Volg Nuus24 op Twitter