Raaisel oor aktrise se dood verdiep

2013-01-15 09:53

Los Angeles – ‘n Nuwe verslag wys dat wonde wat op die aktrise Natalie Wood se lyf gevind is, dalk voor haar verdrinking toegedien is.

Amptenare in Los Angeles het in 'n addendum tot Woods se lykskouing-verslag gesê van die wonde is dalk toegedien voordat die aktrise verdrink het, maar dit kan nie bo redelike twyfel bewys word nie.

‘n Ondersoek na Wood se dood in 1981 is weer in 2011 heropen.

Wood het glo verdrink na sy 'n dag op 'n boot spandeer het.

Haar man, Robert Wagner, die akteur Christopher Walken en die boot se kaptein, Dennis Davern, was almal aan boord tydens die voorval.

Amptenare het die saak destyds afgehandel en bevind die 43-jarige aktrise het verdrink. Sy was dronk en kon nie swem nie.

Die polisie hou steeds vol dat die nuwe ondersoek niks te make het met Davern se opspraakwekkende boek waarin hy beweer Wagner is verantwoordelik vir Wood se dood nie.

– Volg Nuus24 op Twitter


 

- Sapa - AP