R80 milj. vir SA huis waar Diana tuisgegaan het
2012-05-07 10:15
Kaapstad – Tarrystone, die grasdak-herehuis teen die hange van Tafelberg waar Diana, prinses van Wallis, 'n maand voor haar dood tuisgegaan het, is in die mark vir R80 miljoen.
Die huis het 'n rukkie gelede aan die markgraaf Spencer behoort.
Die huidige eienaars van die huis het gevra dat hul name nie genoem word nie.
Hulle het bevestig dat die meubels wat die prinses 15 jaar gelede gebruik het, steeds in die sogenaamde "Diana-gastesuite", met ondermeer 'n en suite-badkamer en leefarea, staan.
Die landgoed het twee wingerde, 'n tennisbaan, 'n gimnasium, sauna, jacuzzi en 'n swembad en bied 'n skouspelagtige uitsig oor Valsbaai.
Die alleenagent is Seeff Eiendomme.
Die afwerkings sluit in blindings en kandelare uit Venisië, ondervloerse verhitting, lugverkoeling en verwarmer-handdoekrelings. Daar is twee kombuise wat met soliede eikehout afgewerk is.
Die huis is in 1998 deur weerlig beskadig. Die markgraaf en sy kinders, Kitty, die tweeling Eliza en Katya, en Louis het by die huis opgedaag terwyl die dak aan die brand was.
Spencer het die eiendom 'n jaar later vir R8 miljoen verkoop omdat hy glo "verveeld" was met Suid-Afrika. Hy is toe terug na die Althorp-landgoed in Northamptonshire waar Diana begrawe is.
– Lees meer hier
– Volg Nuus24 op Twitter
