Publiek kan weer Pretoria-kunsmuseum besoek
2012-11-21 13:23
Pretoria – Die Pretoria-kunsmuseum is meer as 'n week nadat rowers met vyf skilderye gevlug het, weer oop vir die publiek, berig Eyewitness News.
Die polisie het vier van die skilderye verlede week in Port Elizabeth opgespoor, maar 'n Gerard Sekoto-skildery, wat meer as R7 miljoen werd is, word steeds gesoek.
Die Tshwane-munisipaliteit, die eienaars van die galery en die kunswerke, het intussen die sekuriteit by die museum opgeskerp.
Pieter de Necker, woordvoerder vir die burgemeester van die Tshwane-metroraad, het gesê die vier skilderye wat verlede week gevind is, is in "veilige bewaring".
"Hoewel die skilderye uit die oorspronklike rame verwyder is, is dit nie beskadig nie."
De Necker het gesê die skilderye word nou meer beskerm, maar besoekers aan die museum sal steeds hul ervaring kan geniet.
– Lees meer hier
– Volg Nuus24 op Twitter
