Prinses Anne se Zara vier bruilof
2011-07-31 07:00
Johannesburg - Die derde koninklike troue van die jaar het Saterdag in Edinburg, Skotland, plaasgevind.
Koningin Elizabeth II se oudste kleindogter, Zara Phillips (30), is met die Engelse rugbyspeler Mike Tindall (32) in die eg verbind.
In die voorafgaande “blou bloed”-troues is prins William onlangs met Catherine (Middleton) getroud, en die Suid-Afrikaner Charlene Wittstock het ewige trou aan prins Albert van Monaco gesweer.
Phillips is ’n voormalige wêreldkampioen-perderuiter, terwyl Tindall as senter vir die Gloucester-rugbyspan in Engeland uitdraf.
Hy was lid van die Engelse span wat in 2003 die Wêreldbeker in Australië gewen het.
Phillips se trourok is deur Stewart Parvin ontwerp en sy het daarby ’n tiara van haar ma, prinses Anne, gedra.
Die plegtigheid vir die 300 gaste het met skemerkelkies op die koninklike jag Britannia begin.
Die bruilofsfees is by die Holyroodhouse-paleis, die koningin se Skotse woning, gehou.
Onder die gaste was prins William en Catherine, prins Harry, en prinsesse Eugenie en Beatrice.
Hoewel Phillips die dogter is van Anne, die koningin se enigste dogter, beweeg sy baie minder in die kollig as die ander koninklikes.
Sy gaan haar nooiensvan ná die troue hou, blykbaar omdat sy reeds in perdrykringe só bekend staan.
Die paartjie is die afgelope sewe jaar saam nadat hulle deur prins Harry aan mekaar voorgestel is.
Volg Nuus24 op Twitter.
- Rapport
