Prins Harry 'te veel soldaat, te min prins'

2013-01-22 09:52

Los Angeles – Prins Harry het erken dat hy homself in die steek gelaat het toe hy verlede jaar in 'n naakfoto-skandaal in Las Vegas betrokke geraak het.

Die 28-jarige prins is tydens ‘n partytjie in ‘n hotelkamer in Las Vegas naak afgeneem saam met onbekende vroue. Die foto’s is na die tyd aan die media oorhandig.

Die prins het in ‘n onderhoud ná hy vyf maande in Afganistan ontplooi was, gesê hy het nie net homself in die steek gelaat het nie, maar ook sy familie, het TMZ berig.

“Op die ou end was ek in ‘n private area en daar moet ‘n sekere mate van privaatheid wees. Ek dink nie die manier hoe ek behandel is, is aanvaarbaar nie,” het Harry gesê.

“Dis ‘n goeie voorbeeld van 'n geval waar ek te veel van 'n soldaat, en te min van 'n prins was.”

– Volg Nuus24 op Twitter