Pornografie op DStv?
2010-02-24 06:59
Thinus Ferreira
Kaapstad – MultiChoice oorweeg dit om pornografie uit te saai, sowel as die moontlikheid om nuwe sekskanale op DStv se satelliet-betaaltelevisiediens te skep.
“MultiChoice is die afgelope paar maande oorval met versoeke vir volwasse inhoud op DStv,” het Jackie Rakitla, hoofbestuurder van korporatiewe sake by MultiChoice, gister by navraag gesê.
“In dié stadium doen ons slegs navorsing om vas te stel hoe groot die belangstelling in volwasse inhoud is en kyk ons na die uitvoerbaarheid van so ’n diens.”
In e-pos vir marknavorsingdoeleindes toets MultiChoice die belangstelling in verskillende uitsaai-opsies soos “gemengde pornografie” op DStv (harde pornografie tussen 21:00 en 05:00 en sagte pornografie tussen 05:00 en 21:00), harde pornografie 24 uur per dag, of sagte pornografie 24 uur per dag.
Respondente word ook gevra wat hulle dink die impak op die beeld van MultiChoice en DStv as handelsnaam sal wees.
“Geen besluit is nog geneem nie,” het Rakitla gesê. “Wanneer ons die mate van belangstelling en die uitvoerbaarheid van so ’n diens vasgestel het, sal ons ’n finale besluit neem.”
MultiChoice wou nie antwoord op die vraag wat die impak op die uitsaaier se beeld sal wees nie.
Die gratis TV-diens e.tv, wat ’n ruk gelede die uitsending van laatnag-erotika op Vrydae en Saterdae gestaak het, het gister gesê dit is gedoen omdat “e.tv programinhoud gedurig hersien”.
- Beeld
Hoe voel jy oor dié saak? Gee hier jou mening.