Porno-TV: Regsoorlog breek uit
2011-12-07 07:00
Johannesburg – ’n Oorlog het uitgebreek nadat African Satellite Installations (ASI) aangekondig het dat ’n nuwe 24 uur-pornografiekanaal van volgende maand af plaaslik beskikbaar is.
Suid-Afrikaners sal van middel Januarie af hardgebakte pornografie op die Franse Porn Satellite TV (PSat) kan sien mits die gebruiker ’n ekstra dekodeerder en slimkaart teen R99 aanskaf, het John Solomon van ASI geadverteer.
TopTV, wat reeds om ’n lisensie van die Onafhanklike Kommunikasie-owerheid van Suid-Afrika (Okosa) aansoek gedoen het om pornografie op drie video-kanale uit te saai, wil ’n regsgeding teen PSat aanhangig maak en beskuldig die kanaal van wanvoorstelling en misbruik van die TopTV-handelsmerk, het mnr. Marius Liebenberg van TopTV gesê.
“PSat moedig kopers van dié kanaal aan om hul TopTV-dekodeerders te ontkoppel (wanneer hulle na die PSat-kanaal wil kyk), maar sê nie aan gebruikers dat dit onwettig is nie. Dié optrede skend TopTV se regte.”
Volgens Solomon het TopTV geen gronde vir ’n regsgeding nie. “Die Franse kanaal is reeds drie jaar lank aan Afrika-lande bekend en ek hoef nie ’n lisensie daarvoor te bekom nie. Ek is ook net die verspreider van die dekodeerder en nie die uitsaaier of die eienaar van die kanaal nie.
“Verskeie kanale, soos TopTV en PSat, huur ruimte op die Astra 4A-satelliet. Dekodeerders wat plaaslik te koop is, kan egter net sekere kanale opvang. Al wat ek doen, is om ’n dekodeerder te verkoop wat onder meer dié pornografiekanaal kan opvang.”
Meer as 2 500 belangstellendes het Solomon glo reeds gekontak.
Volgens Paseka Malek, Okosa-woordvoerder, het Solomon egter wel rede tot kommer.
“Dit is nie duidelik van waar dié dekodeerders kom nie. Okosa moet die invoer van dié toerusting eers goedkeur voordat dit versprei kan word.
“Daarby het Okosa nie ’n aansoek om ’n lisensie vir die verspreiding van pornografie deur PSat ontvang nie. Omdat kykers moet inskryf op die kanaal is dit onderhewig aan Okosa se goedkeuring.”
Malek het gesê TopTV se lisensie om pornografie uit te saai, is nog nie toegeken nie.
Ook prof. Kobus van Rooyen van die Uitsaaiklagtekommissie van Suid-Afrika (Ukksa) het gesê alle kanale wat plaaslik uitgesaai word, is onderhewig aan die kommissie se gesag.
“Subskripsiekanale wat direk van die buiteland uitsaai, is nie onderhewig aan sulke streng reëls nie. Daar is egter perke soos haatspraak, eksplisiete X18-seks en sinlose geweld.”
– Volg Nuus24 op Twitter
- Beeld