Pomp net waar jy wil
2010-01-19 12:38
Herman Eloff
Resensie: Pomp Joernaal 09 (Griffel)
Kaapstad – Geniet hom op die strand. Span uit met hom op jou bed. Verlustig jou in hom by die koffiewinkel. Bestudeer hom skelmpies in jou sitkamer. Hy beloof om jou ure se genot te verskaf.
Pomp; Morning After uitgawe is die tweede uitgawe van dié uiters suksesvolle Afrikaanse joernaal. Dikker as ‘n Etienne van Heerden novelle en met meer foto’s as die laaste uitgawe van Insig is hierdie ‘biblioteek van gedagtes’ ‘n moet-hê vir enigiemand wat hou van lees in ons moeder van tale.
Die beste van alles is dat Pomp gerieflik in jou skouersak inpas en ‘n aangename reisgenoot maak. Hy kan net so gemaklik op jou bedkassie lê of sy plek volstaan op jou boekrak.
Reeds van eerste oogopslag vang die joernaal jou aandag met sy verleidelike aardsheid en smaakvolle uitleg. Die visuele aspek word nooit afgeskeep nie en komplementeer die insiggewende skryfwerk.
Skrywers waag dit om buite hulle genre en gemaksone te beweeg. So skryf Joan Hambidge oor die Boere-oorlog en na verbasing pis Deon Maas niemand af met sy artikel oor Rwanda nie. Dit is egter Erns Grundling se interessante kykie na die lewe van rofstoeiers in Suid-Afrika wat die show steel.
Charlene Truter, Anna Davel, David Kramer, Laurinda Hofmeyer en Lize Beekman praat prontuit oor hulle hartsake terwyl onbekendes ook kans kry om hulle stories te vertel.
Pomp probeer jou nie beïndruk met sy intellektuele vlak nie. Hy wissel gemaklik van lekker-lees-stories tot ernstige artikels. As jy hou van boeke, fotografie, kuns, letterkunde, musiek, ontwerp, reis, sport of wyn, moet jy eenvoudig vir jou ‘n Pomp kry.
Die enigste probleem wat ek met hierdie joernaal het, is die feit dat hy slegs eenmaal ‘n jaar uitkom.
Maar geniet hom happie vir happie, sodat hy storie vir storie soos sjokolade roomys langs die swembad in jou mond wegsmelt.
Uitgewer: Griffel Media
Koste: Beskikbaar teen R 207.00 op Kalahari.net
–Nuus24