Politieke party wil Elton John in Maleisië verbied
2012-11-27 13:39
Kuala Lumpur – 'n Islamitiese politieke party het Dinsdag die regering van Maleisië gevra om Elton John te verbied om 'n konsert in die land te hou.
Volgens die party bevorder die sanger, wat openlik gay is, "immorele waardes".
John, wat gewild is in Maleisië, sal na verwagting Donderdag by 'n oord buite die hoofstad Kuala Lumpur optree.
"Die konsert moet gekanselleer word. Kunstenaars wat betrokke is by gay- en lesbiese aktiwiteite moenie toegelaat word om in Maleisië op te tree nie, omdat dit die verkeerde waardes sal bevorder," het Nasrudin Hassan Tantawi, hoof van die jeugvleuel van die Pan-Malaysian Islamic Party (PAS), gesê.
Die legendariese sanger-liedjieskrywer het verlede jaar te midde van 'n soortgelyke klag van die party, in Maleisië opgetree.
Die 65-jarige sanger is in 2005 met sy Kanadese lewensmaat David Furnish getroud. Die paartjie het op Kersdag in 2010 ouers geword.
Nasrudin het gesê die party beplan nie enige betogings nie, maar sal "eis dat owerhede die immorele vertoning kanselleer om ons samelewing teen maatskaplike agteruitgang te beskerm".
– Volg Nuus24 op Twitter
- Sapa - AFP
