Polisie sak toe op Cowell se huis ná fopoproep

2012-11-27 10:16

Los Angeles – Die polisie het toegesak op die Britse TV-persoonlikheid en musiekvervaardiger Simon Cowell se huis nadat hulle 'n fopoproep ontvang het.

Cowell is die nuutste slagoffer in 'n rits oproepe waarin die polisie na glanspersoonlikhede se huise ontbied word.

Beamptes het hulle Sondag na Cowell se huis gehaas nadat 'n oproep oor "onbekende moeilikheid" ontvang is, het Lincoln Hoshino van die Beverly Hills-polisiekantoor gesê.

Hoshino het verder gesê met die polisie se aankoms was Cowell tuis, maar geen misdaad is aangemeld nie.

"Die inbeller het gesê iemand in die huis is vasgebind en het hulp nodig."

Ander slagoffers van die fopoproepe was Ashton Kutcher, Miley Cyrus en Justin Bieber.
    
– Volg Nuus24 op Twitter

- Sapa - AFP