'Platteland' wegholsukses by die loket
2011-11-30 07:07
Johannesburg – Die Afrikaanse musiekdrama Platteland het in sy debuutnaweek R1,7 miljoen by die loket verdien, meer as enige ander Afrikaanse fliek in sy genre.
Net The Twilight Saga: Breaking Dawn – Part 1 en Happy Feet 2 het die naweek beter gevaar. “Platteland het 11% meer mense as Bakgat 2 en 144% meer as Jakhalsdans gelok,” het Helen Kuun van Indigenous Film Distribution, verspreiders van die fliek, gesê.
Meer as 48 000 mense het Platteland deur die skrywer Deon Opperman en regisseur Sean Else gesien sedert dit Vrydag begin draai het.
Steve Hofmeyr, wat die rol van Mike Ferreira speel, het Else geloof vir sy werk.
Die fliek vertel die verhaal van Riana van Niekerk (Lianie May) wat veg om haar familieplaas uit die gierige hande van Mike Ferreira te hou. Dis totdat Dirk Pretorius (Bok van Blerk), ’n voormalige soldaat van die spesiale magte, in die dorp opdaag.
– Volg Nuus24 op Twitter
- Beeld