Pieter-Dirk op Berlynse fliekfees vereer
2011-02-08 09:14
Kaapstad – Die Suid-Afrikaanse vermaakkunstenaar en MIV/vigs-aktivis Pieter-Dirk Uys word op 18 Februarie op die Berlynse rolprentfees met ’n Teddy-prys vir sy lewenswerk vereer.
Dié internasionale prys word vanjaar die 25ste keer uitgeloof. Vorige wenners sluit in die rolprentmakers Pedro Almodóvar, Gus van Sant, Derek Jarman en die akteurs Helmut Berger, John Hurt en Tilda Swinton.
Meer as 3000 gaste uit die kuns-, vermaak-, ekonomiese en die politieke sektore word by die oorhandigingsseremonie in Berlyn se ou Tempelhof-lughawe verwag.
Uys kry die Teddy vir sy volgehoue werk in MIV/vigs-opvoeding en sy werk as die vermaakkunstenaar Evita Bezuidenhout, die vrou wat oudpres. Nelson Mandela as die bekendste wit vrou in Suid-Afrika bestempel.
Evita het reeds haar spoggerigste Errol Arendz-uitrusting gereed, het Uys uit sy tuisdorp, Darling, gesê.
“Evita gaan vir die vroue sê om terug te gaan na hul kombuise en vir hul mans te kook. Dan sal daar minder oorloë wees.”
Op ’n ernstige noot wil Evita ook die internasionale podium gebruik om die “Arabiere en die Jode te versoek om soos Christene saam te leef”, voorts wil sy die Duitsers en Suid-Afrikaners versoek om met optimisme vorentoe te kyk.
Daarby gaan sy die Art Deco-lughawe wat deur die Nazi’s gebou is met die Voortrekkermonument vergelyk, waarheen ’n mens nou kan gaan om “lekker piekniek te hou – die polisie sal ons nie meer wegvat nie”.
Uys sal ook op 20 Februarie ’n uitvoering van sy vertoning Desperate first ladiesin die Joodse museum in Berlyn gee, die museum waar sy oorlede moeder se klavier gehou word.
Luidens ’n nuusverklaring gaan Uys sy Joodse herkoms en Afrikaanse erfenis besing en wil hy die gehoor daaraan herinner dat ’n patriot “ook iemand kan wees wat sy vaderland teen sy regering beskerm”.
Volg Nuus24 op Twitter
- Volksblad