Penn aangekla van aanranding
2010-02-20 13:22
Los Angeles – Die Oscar-bekroonde akteur Sean Penn is Vrydag aangekla van aanranding en vandalisme nadat hy by ‘n bakleiery met ‘n fotograaf betrokke geraak het.
Penn (49) kan tot 18 maande se tronkstraf gevonnis word as hy skuldig bevind word. Die hofsaak sal op 22 Maart vanjaar afskop.
Dié voorval het in Oktober verlede jaar buite ‘n besigheid in Brentwood, Kalifornië plaasgevind. Dit is deur ander lede van die paparazzi afgeneem.
Penn is aangekla daarvan dat hy die fotograaf geskop het en sy kamera beskadig het.
Dié akteur het sowat 20 jaar gelede ‘n paar weke in die tronk spandeer op ‘n klag van aanranding. Hy was ook in die hof vir ‘n klag van dronk bestuur en vir ‘n bakleiery met sy eks-vrou, die sangeres Madonna.
- Sapa