Penelope se ‘droom-jaar’
2009-11-19 12:30
Los Angeles – Penelope Cruz voel ongemaklik om oor haar naaktonele te gesels, en het glo ‘n allergie vir etikette.
Maar wanneer sy oor haar ‘droom-jaar’ praat, en haar twee rolprente wat binnekort by teaters vertoon gaan word, raak sy woordryk en mededeelsaam.
Die eerste rolprent wat haar aan die gesels kry is Broken Embraces, vervaardig deur Pedro Almodovar. Dit is Cruz se vierde rolprent in oorleg met dié rolprentmaker, wat gehelp het om van haar ‘n stêr te maak.
Die tweede rolprent wat die aktrise laat breed glimlag, is ‘n musikale blyspel, Nine, deur die vervaardiger Rob Marshall, wat haar stem en danspassies bietjie uitgedaag het.
Albei rolprente sal hopelik stemme vir 'n Oscar benoeming verwerf, gedurende Hollywood se toekennings-seisoen.
“Ek kan voel ek het baie geleer, omdat die rolprente so verskillend van mekaar was. Om vir die eerste keer professioneel te sing en dans in Nine, was ‘n skrikwekkende ervaring. Terwyl Broken Embraces weer soos drie vroue in een was. Ek voel soos die gelukkigste meisie in die wêreld,” het die Spanjaard gesê.
Broken Embraces maak Vrydag in Amerikaanse teaters oop, nadat dit goeie resensies by rolprentfeeste gekry het.
Nadat sy reeds die rolle van ‘n prostituut, kloostersuster, transvestiet en ook ‘n vrou wie se man in ‘n yskas begrawe is, gespeel het, het sy nou die uitdagende rol van ‘n arme assistent vir ‘n geldmagnaat gespeel in Broken Embraces.
“Elke keer wat Pedro ‘n manuskrip aan my gegee het, het ek my alles gegee. Die karakters wat ek gespeel het, was so verskillend van mekaar en van die tipe mens wat ek is,” het sy gesê.
- Reuters